政情：梁繼昌轉新髮型 備戰渡海泳
立法會啱啱放完暑假，尋日正式復會，唔少議員都抖足精神返嚟開會。繼漁農界何俊賢以剃光頭示人後，會計界梁繼昌（Kenneth）都換咗新形象，不過佢就冇剃光頭喇，而係兩邊剷青。
指剪短後兩分鐘就乾
以往Kenneth嘅髮型都係九一分界、前面頭髮斜梳，而兩邊頭髮則留厚。新髮型望落好清爽，除咗將兩邊頭髮剷青外，前面頭髮亦有剪短同埋向前梳，離遠睇會有少少似平頭裝。唔知係咪啲頭髮剪到比較短，以前嘅九一分界似乎消失咗。
至於點解要剪新髮型？Kenneth解釋，話六年前做咗議員之後，髮型一路都冇變過，而嚟緊佢會去游渡海泳，所以索性剪短啲，可以方便游。佢仲自爆，話依家去游完水，啲頭髮兩分鐘左右就乾喇。好多時男士習慣咗一個髮型，就未必會想轉，Kenneth今次換新形象，可以話係煥然一新。