政情：立會會議室完成擴建 鄭泳舜謝偉銓終可「埋堆」
每當立法會審議具爭議性嘅議題時，不時都會上演「動作片」，所以秘書處會安排後備會議室，若果一有事就轉場。位於大樓二樓嘅會議室二喺暑假期間完成擴建，由原來嘅六十六個座位增至八十四個，而根據最新座位表，入咗立法會半年多嘅「議會新丁」民建聯鄭泳舜同建築界謝偉銓，終於可以同自己友「埋堆」，免去分離之苦。
加位後可容納全員
立法會以往就只有會議廳同會議室一可容納全體議員，其中會議室一經常開財委會同工務小組會議，一旦發生衝突，議員就要轉去會議廳開會。據了解，上年度秘書處已將會議室二列為財委會後備會議室，皆因有議員反映唔想走上走落去會議廳，所以之前準備咗好多流動枱櫈備用，等會議室進行擴建。
根據最新會議室二座位表，鄭泳舜同黨友何俊賢為鄰，左後方就係幾有分量嘅黨友黃定光，右後方更係黨友兼建制派副班長陳克勤；謝偉銓則重歸「六人組（G6）」，同旅遊界姚思榮做鄰居。議會陣線區諾軒同范國威，就分別同朱凱廸及陳志全坐埋一齊。