政情：阻激進派攬公務員事務正副主席 建制班長踢走朱凱廸

喺三十六個正副主席席位當中，今年建制同泛民各自取得十八個，同上年比較之下，今年非建制派同樣都包攬咗六個主席位，不過副主席就多咗一席，變咗有十二個，當中民主黨同專業議政各自有五席，屬大贏家。而喺上年成立嘅議會陣線，今年佔咗兩席，分別係區諾軒同新民主同盟嘅范國威，其中范國威仲當選公務員及資助機構員工事務委員會主席。至於建制派方面，今年雖然少咗一席，但民建聯（民記）一如既往成為大贏家，今年仲佔七席，比上年多兩席。

泛民覺得係雞肋 認為冇損失

而喺尋日嘅爭奪戰中，朱凱廸曾經兩次競逐正副主席，而當范國威當選公務員及資助機構員工事務委員會主席，據悉部分建制派對呢個結果嘩然，後來朱凱廸競逐副主席一職，建制派即急推建制派「班長」、商界議員廖長江爭副主席一職，雖然朱嘅提名得到自由黨邵家輝和議，但可惜最後只得五票，不敵對方十三票而落敗。值得一提嘅係，廖長江有政制事務委員會主席不做，竟競逐另一個委員會嘅副主席，確實耐人尋味。

有建制中人事後解釋，話喺協調過程中，大家唔會透露實質名單，但講好咗呢個職位係由民主派出任。至於尋日嘅情況，佢就話因為當時范國威做咗主席，朱凱廸被提名為副主席時，佢哋就認為唔應該由兩個激進派包攬晒委員會嘅正副主席，所以最終就提名咗廖長江，但強調唔係針對朱凱廸。

本來可以有多一席，但依家冇咗，有泛民中人就覺得呢個委員會係雞肋，所以都冇損失。同時佢仲解釋，話大家都係按興趣報名，咁啱范國威同朱凱廸都對公務員有興趣，所以先有意出任正副主席喎，而事後建制派都有解釋番廖長江選副主席嘅原因。

另外，建制派喺工商事務委員會上，本來想提名民記黃定光（象哥）做主席，但秘書處就提醒，話佢係方便營商諮詢事務委員會主席，所以唔做得。轉個頭象哥就即刻提名旅遊界姚思榮，但姚似乎未回神，仲反問佢「乜唔係你咩？」一場爭奪戰就有咁多甩轆，睇嚟不論建制泛民，都應該要溝通清楚先做決定喇！