中環出更：被笑大肚腩 陳恒鑌：淺色衫累事
班議員隔咗個暑假無見，立法會復會見番面自不然互相點評一番。民建聯（民記）蔣麗芸（Ann）聯同經民聯嘅梁美芬，一齊「攻擊」自己黨友陳恒鑌（Ben），猛話對方暑假過後變咗大肚腩，搞到阿Ben爭啲要剝衫澄清。
阿Ben話尋日突然好多人話佢大肚腩，佢就大呻係着嘅衫出咗事。原來佢着嘅灰色Tee恤，係由上而下漸漸變淺色，佢話淺色令人覺得較鬆身，而最淺色嗰位又啱啱喺肚腩位，結果造成誤會。不過，佢亦承認自己無腹肌，只有「六神合體」。
梁美芬晒相 阿Ann唔多受
畀人笑完大肚腩之後，輪到佢同阿Ann讚梁美芬瘦咗。阿Ben乘機復仇問係咪壓力太大，梁美芬否認，話係瘦身成功，又哄埋阿Ann度，用手機展示自己瘦身後嘅相畀阿Ann睇，不過阿Ann似乎唔多受落，爆咗句「睇呢啲做乜？睇你兩個仔好過啦」，引嚟全場大笑。
卓妮