中環出更：恒指大瀉張華峰開會睇實股市
環球冧市，恒生指數前日一度瀉逾千點。雖然立法會尋日舉行答問大會，畀立法會議員就政府前日發表嘅施政報告提出質詢，但作為業界代表嘅金融服務界議員張華峰（肥老闆）就好關心個市，事關佢喺答問大會提問之餘，都仲可以不時用手機睇股票。睇嚟一心二用對肥老闆嚟講，都係濕濕碎等閒事喇！
立法會每逢舉行答問大會，都有議員不敵冗長沉悶嘅會議內容，要玩吓手機。肥老闆尋日都不時睇手機，但係佢就唔係打機或睇社交網站，而係睇股票。股市大瀉，又難怪佢咁關心嘅。而飲食界議員張宇人就同過往一樣，喺會上都有用手機玩接龍。佢對接龍遊戲都真係幾「專一」。 至於工聯會幾位議員包括麥美娟、陸頌雄、郭偉強亦都成日低頭睇電話，睇電話時間分分鐘多過抬起頭，唔知佢哋答問大會後會唔會頸痛呢？
陳帥夫同象哥瞌眼瞓
有人忙於睇電話，亦都有人瞌眼瞓。政制及內地事務局副局長陳帥夫唔知係咪唔夠瞓，喺會上都合埋眼好一段時間，之後擘大眼冇耐，又再合埋眼幾分鐘，不斷重複。而佢閉目養神嘅時候，亦都不時搖吓個頭，係瞌着咗定係做緊頸部運動就佢自己先知喇。而疑似閉目養神嘅仲有進出口界議員「象哥」黃定光，佢身體向後挨住張櫈，用左手掩住雙眼，一副「冇眼睇」嘅樣，分分鐘可以成為網友改圖嘅「潛力圖」。
正所謂遲到就好過冇到，呢樣嘢就好明顯喺醫學界議員陳沛然身上反映到。事關佢喺會議完結前廿分鐘先至匆匆行入會議廳，喺佢附近嘅議員都望咗兩眼。佢一坐低就拎起議員座位杯水嚟飲，飲完一啖又一啖，似乎好口渴。坐咗唔夠十五分鐘，佢就離開會議廳喇，其實爭幾分鐘都完會，都唔爭在坐到尾，如果只係想飲水，立法會大樓好多地方都有水飲嘅。
卓妮