職場健康：護眼坐姿正 免患電腦視覺綜合症
文仔和明哥是辦公室文員，會議前明哥發現文仔雙眼通紅，滿懷心事，於是問：「文仔，你做得唔開心呀？你眼紅紅又冇乜心機嘅？」文仔說：「唔係呀！我呢排對眼唔知咩事，成日都好攰好乾，仲時不時有啲痛。」明哥繼續問：「咁你有冇頭痛、視力模糊同肩頸痛？」文仔答：「咦！點解你會知嘅？」
屏幕眼睛距離約手臂長度
「你可能已患上『電腦視覺綜合症』！可能同你最近徹夜不眠趕報告有關！根據外國眼科協會指，呢個綜合症可簡單理解為因長時間使用電腦，而引起不同嘅眼睛和視力問題。」明哥續說：「引起相關眼部問題主因係當我哋睇電腦時往往聚精會神，眼睛嘅眨動頻率會較平時睇遠景低，引致聚焦疲勞。當然，工作環境照明，我哋坐姿、電腦屏幕設置都有關係。」
「咁可以點預防呀？」文仔問。
明哥答：「首先你要適當設置同調校電腦屏幕，屏幕最頂一行字樣約在或略低於眼睛水平、屏幕同眼睛嘅距離約為一隻手臂、減低屏幕眩光及反光情況。用電腦時保持正確坐姿，注意照明是否合適。休息時亦可參考20-20-20護眼法，即每使用電腦約廿分鐘，便遠眺至少廿呎外景物約廿秒休息。」
明哥又提到。「仲有呀！頭先講嘅都係一般情況咋，你對眼咁紅，快啲搵個註冊眼科醫生檢查吓啦！」文仔答：「知道喇明哥！」
職業安全健康局
www.oshc.org.hk