毛伯伯教落要除四害，事關老鼠、曱甴、烏蠅同蚊永冇好帶挈，人人恨不得除之而後快。可惜吖，港府滅蚊懶懶閒，滅鼠又求求其，其中黃大仙區最慘，蚊患未絕鼠患又來，疫情不斷，搞到市民叫苦連天，怨聲載道，直頭神憎鬼厭，唔通真係要黃大仙親自出手除害？
自從黃大仙彩雲邨爆出全球首宗老鼠傳染人類戊型肝炎個案後，區內居民有得震冇得瞓。該區月前至爆發本地登革熱個案，呢頭忙住滅蚊，嗰頭又要忙住滅鼠，港府搞公共衞生簡直差到冇朋友，市民唔嬲就假。呢，黃大仙區議會尋日就鬧爆當局滅鼠仍然停留喺阿嫲嗰代，唔止倚賴老鼠籠同老鼠夾，老鼠米仲要用死紅藍兩隻色，直頭當正老鼠好似港官咁蠢，唔識趨利避害。官老爺一味死撐有做新科技滅鼠試驗，但就噏極都噏唔出係咩名堂，只係例牌搬出「效果欠佳」、「要再研究」做擋箭牌，總之就市民急官老爺唔急，吹脹。
幾時都話，一個地方多老鼠，一定係懶貓唔做嘢。呢個政府喺黃大仙區滅蚊唔掂，滅鼠又再衰一鑊，搞到疫情爆完再爆，點止居民唔高興，直頭連赤松仙子黃大仙都大派嬲嬲。正如彩雲邨啲街坊話齋，啲老鼠唔止喺垃圾站出沒，仲要入晒屋，居民隨時成為下一個戊肝患者，話唔驚就呃你，偏偏港府連「全球第一」咁羞家嘅「榮譽」都攞埋，滅鼠依然踢一踢，郁一郁，唔通真係要等到老鼠聯群結隊，咬爛門常開政府總部，佔領禮賓府至心足？反正獅子山公園都因為登革熱而封園，連代表香港精神嘅獅子山都可以變成蚊子竇，唔爭在成個區都烏煙瘴氣啦。
冇錯嘞，滅鼠好應該與時並進，當外國已經用緊二氧化碳等先進方法殺老鼠，港府嘅思維仲停留喺咸豐年代，簡直笑大人個口。講起傳統老鼠籠，家陣啲老鼠畀港府養到仲大過隻貓，分分鐘想入都入唔到，捉條毛咩。所以話，旨意呢個又懶又笨嘅政府用高科技，盞嘥氣嘅啫，港府夠話引入石油氣誘捕蚊機啦，咪又係畀人踢爆喺部機外殼貼防蟲貼嚟吸蚊裝假狗。
講來講去，港府滅鼠方法已經夠晒老土，負責滅鼠嘅食環前線人員唔係蛇王偷懶，日做三粒鐘，就係同房署互相卸膊，市民旨意官老爺滅蚊滅鼠，真係蚊都瞓、蛇都死。家陣冇嘢盼，就盼黃大仙大顯神通，出手救萬民於水火。
話時話，老鼠同蚊子為禍香港，都係拜港府無能累街坊，要除四害，唔該順便加埋廢官劣吏。「五害」一除，咁香港就一天都光晒！