政情：林子琼嬌小 林卓廷被誤認帶個女落區
立法會議員林卓廷（阿廷）最近無啦啦多咗個女？原來近日被發現佢成日同埋個女仔一齊落區企街站，其實個女仔係佢嘅社區主任林子琼，街坊見林子琼細細粒，成個細路女咁，咁啱兩人同姓林，先誤以為阿廷帶埋個女落區。
雙牌頭風波 料最差十多人退黨
阿廷話，林子琼係香港活木球運動員，好有運動員嘅「毅力」，曾喺大熱天時企街站三至四個鐘都唔呻攰，雖然以年齡計，佢生得出林子琼，但都要好早生先生得出，又話佢個女高過林子琼好多。
咁落力做地區工作，唔通係擔心其所屬嘅民主黨最近鬧出「雙牌頭」風波，會影響明年嘅區議會選舉？阿廷就話估計風波會持續一段時間，最壞情況可能有十多個黨友會退黨。如果真係不幸發生咁嘅情況，佢都惟有靠自己努力做好地區工作。
佢又話立法會新一個年度佢唔會再出任立法會交通事務委員會副主席，其他委員會正、副主席都無意角逐，料公民黨議員譚文豪會接替交通事務委員會工作，仲話市民對立法會一般議題都唔係咁熱衷，所以會擺多啲時間喺地區工作。咁快開始重新分配工作安排，唔通佢都擔心「雙牌頭」風波嘅影響，所以提早執定手尾先？