政情：增加勞工假惹熱議 麥美娟多得吳宏斌減白領假論
香港中華廠商聯合會會長吳宏斌近日提出，白領每年有十七日假期太多，應該減至十一日，同勞工假睇齊，引起各界抨擊。工聯會一直爭取勞工假加到十七日，同銀行假睇齊，立法會議員麥美娟（Alice）尋日出席一個活動，被問到吳宏斌嘅講法，佢就話多謝呢啲咁嘅老闆，「令到我哋咁多嘢做，咁多嘢講」。
Alice話以前爭取勞工假加至十七日，講完都可能冇人理，冇咁多人有咁嘅感覺，依家有呢啲老闆幫手咁樣推波助瀾，就引起社會關注。佢仲話當大家都覺得公平假期安排幾咁重要時，吳宏斌嘅講法好Out。
認為超時冇補償引致
喺尋日嘅活動上，Alice又扮老闆又扮打工仔。佢之後講起以前做寫字樓時，朝早九點至下午四點，上司都見唔到人，原本六點應該收工，但上司四點半就會突然出現，叫佢做嘢，「將會做到你死亡咁樣」，同好多白領出現嘅問題一樣，認為係因為依家大部分打工仔超時工作，都冇補水或補假，先會出現咁嘅情況。