政情：十一遊行人數減 泛民吸金慘淡

民間人權陣線（民陣）喺前日發起十一遊行，主題為「拒絕危城」，批評政府制度崩壞，再加上有沙中線醜聞，令到市民生活喺危城之中。遊行主題包含咗唔少近期社會上極具爭議嘅議題，但偏偏大會公布只有一千五百名遊行人數，都算失威。

不迅速公布數字 冷處理籌款大跌

每次遊行都係政團吸金嘅大好機會，喺遊行路線沿途擺設街站籌款，係唔少政團嘅主要收入來源，而明年已經係選舉年，各大政團嘅支出勢必有增無減，所以更加有需要未雨綢繆。不過今次遊行嘅吸金力就非常一般，多個政團都有別以往迅速公布籌款成績嘅做法，似乎係想冷處理吸金失敗呢個事實。

社民連以往吸金力強勁，好似今年七一遊行就籌到接近四十六萬元，而今次佢哋嘅副主席黃浩銘都有參與遊行兼嗌咪，但都只籌到約三萬六千元。向來以激進泛民自居嘅社民連，往往走到抗爭前線，所以唔少成員都曾經遭警方拘捕同檢控，可謂官非纏身，但今次只係籌得三萬多元，都唔知幫到幾多喇！

傳統泛民方面，由楊岳橋做黨魁嘅公民黨今次就只得一個位喺利園山道嘅街站，結果就只係籌得一萬元，比今年七一遊行嘅籌款數字減少咗超過廿一萬元。不過，工黨成績就更加慘淡，只係籌得九千多元，令人關注其財政壓力。事關工黨喺兩年前立法會換屆選舉失利，議席大縮水，由四席跌到只剩一席，收入自然減少，而現時唯一立法會代表張超雄又表明唔會角逐連任，所以下屆選舉成本自然上升，先能夠確保順利交棒，如果未來籌款數字繼續縮水，睇嚟佢哋嘅主席郭永健真係唔知點算好。

至於民陣今次籌得大約二至三萬元，主要用作行動開支，例如音響、舞台等，而且有別於七一遊行，冇強烈要求團體要捐出十分一款項，所以今次籌款數字自然都會減少。不過，「守護公義基金」亦籌到六位數字，總共有十萬六千元，但對比之前都係下跌囉！

泛民近年遊行成癮，相隔幾個月就會巧立名目搞遊行集會，順道設街站吸金。今次吸金失敗，係咪反映市民已經認清佢哋借公義為名、掠水為實嘅行徑呢？