中環出更：驚被抽後腳 朱凱廸申報收高鐵紀念郵票
廣深港高鐵香港段由決定建造到開通一直都備受爭議，從早年嘅菜園村村民被迫遷事件，到一地兩檢都有唔少人反對，立法會議員朱凱廸都係其中一個唔撐高鐵嘅人。不過，佢上月底竟然喺立法會《個人利益登記指引》申報收到港鐵寄嚟嘅一套高鐵開通紀念郵票，睇落同佢過往嘅立場有矛盾喎。
稱會研究退還手續
朱凱廸解釋，基於佢嘅議員身份，港鐵主動送咗一套郵票畀佢，但一直反高鐵嘅佢其實都唔想要，直言想退番畀港鐵，惟因冇辦法即時退回，如果期間畀人發現佢持有一套郵票而冇申報嘅話，反而會畀人抽後腳，所以都係申報咗先穩陣啲。
佢申報嗰套郵票一共四個，價值分別為二元、三元七角、四元九角同五元，目前未有其他議員申報擁有呢套郵票，佢話唔清楚其他議員嘅情況，但當日佢同事收到套郵票後，都知道要小心處理，特登問佢點做，最後決定以防萬一就申報咗先，之後會慢慢研究退還手續咁話。
卓妮