中環出更：離島風災善後難 陳國基再號召義工清塌樹
超強颱風山竹襲港已經逾兩星期，社會上大致回復秩序，但好多善後工作仍未搞掂，特別係偏遠嘅離島地區。特首辦主任陳國基對災後工作相當上心，繼早前去石澳泳灘清理塌樹同枯枝後，尋日再度牽頭號召休班紀律部隊人員去東平洲清理塌樹，仲親自搵咗好多電鋸、水等物資返嚟，結果短短一個下午就開通番島上四條主要行人路，清走咗大部分有倒塌危險嘅樹幹，島上居民都好感激佢哋！
特首辦特別助理李惠尋日就聯同八十名紀律部隊人員去到東平洲，眼見島上水電供應仍然嚴重不足，平日供應食水嘅水井、水缸都因受到破壞而供應緊絀，有居民家中五部發電機壞咗四部，甚至屋企都被大樹壓爛，家具被海水沖走，煮食只可以靠燒柴火，由於島上居民好多都係年長退休人士，災後都冇能力清理現場，所以今次有咁多義工仗義幫手，對災後工作有好大幫助，功德無量。
居民促政府改善防風配套
經此一役，唔少島上居民認為政府應該做番好啲東平洲配套，包括防波堤、行人路等，同時增加船嘅班次，由於該島位置偏遠，運送物資維修家居成本高，政府都應該考慮提供資助。其中居民殷伯仲話，其實唔少居民都諗過搬番東平洲住，但因為配套不足而卻步，如果政府可以把握今次機會做好啲，吸引多啲人返去住，咁就唔使填海啦！
卓妮