有人形容積極嘅人生態度係︰當你改變唔到環境，你可以改變自己心境。而特衰政府消極嘅辦事態度則係︰當你改變唔到安全質量，你可以改變安全標準。港產官僚把關不力，攞市民生命安全較飛，你話唔驚就假！
冇錯喇，功夫茶講緊嘅，之唔係三日一小鑊、五日一大鑊嘅港鐵沙中線工程囉。之前工程被踢爆沉降處處，搞到人心惶惶，點知政府唔係拿拿臨補鑊，反而大幅放寬沉降停工指標，而導致附近商場出現數米裂痕嘅會展站，亦喺尋日正式復工。本報將新標準同沙中線一百二十一個監測點上月沉降數據比較後，發現放寬幅度由百分之二十至四倍不等，亦因為咁，上述監測點嘅安全情況由「肥佬」變「合格」，可以繼續施工，度身訂造都冇咁fit，問你服未。
真係諗極都唔明，安全標準呢家嘢，從來只有精益求精，正如食品添加劑同農藥含量，亦只會愈收愈緊。況且當局今次放寬沉降標準，惡例一開，之後出事亦可以再搬個新數字出嚟蒙混過關，如果咁嘅邏輯成立，不如一次過將指標增加到兩米仲乾手淨腳。有市民批評港府未有做好管理檢測，一味亂搬龍門，可謂一針見血。
開講有話，醜婦奉旨避家翁，運房局局長光頭陳就因為沙中線醜聞不斷，加上風災善後不力，索性潛水謝客，以免繼續獻世。運房局就沙中線工程對周邊建築嘅新通報機制，同樣係鬼鬼祟祟，揀正周五深夜至嚟公布。咪畀人批中，官老爺梗係想等周末過一過冷河，等件事丟淡啲再算。講開又講，呢兩日城中熱門話題，莫過於新界望族喺本報刊登「脫離父子關係」啟事嗰單豪門恩怨，話官老爺唔係博大霧轉移視線，三歲細路都唔信。
即係咁，家陣工程臨門一腳，洗濕咗個頭，始終冇可能半途而廢，為今之計最緊要加強監管，堵塞漏洞。嗱，當局拍晒心口保證，話工程沉降幅度一旦影響附近建築物結構安全，又或者公用設施運作，就會即時叫停港鐵，並公布最新情況喎，聽住先喇，最怕等到就嚟死人冧樓至做嘢，不亦晚乎！再講吖，官老爺講就天下無敵，做就無能為力，沙中線紅磡站落石屎工序，政府夠話進行過三次驗收喇，結果月台咪又係石屎剝落兼鋼筋外露。
所以話啫，沙中線之所以淪為豆腐渣工程，港鐵施工得過且過固然難辭其咎，港府監管缺位更加係罪魁禍首，萬一為咗趕進度而犧牲安全，光頭局長落台謝罪都補唔番。港府最鍾意叫人向前看，咁就唔該做好監管，咪再出亂子吖！