政情：天氣熱難頂 吳志華出席活動求水飲
近期天氣唔係打風落雨就係又熱又焗，行兩步都可能大汗疊細汗。暫任故宮文化博物館館長、康樂及文化事務署副署長吳志華，早前行路去香港大會堂出席一個文化活動，都難頂悶熱天氣，去到會場佢即刻衝入洗手間梳理，至活動將近開始時，又要勞煩在場工作人員畀水佢飲，睇嚟佢都真係好口渴喇。
到會場即衝洗手間梳理
話說我哋喺中環國際金融中心遇到吳志華，見佢將件西裝褸搭喺膊頭上面，行去大會堂，到會場先至着番件褸。雖然只係短短八分鐘路程，但太陽曬住都咪話唔辛苦。佢到咗會場後，第一時間就衝入洗手間梳理一下，到活動差唔多開始，佢又要求飲水，工作人員惟有拎鎖匙開辦公室門，畀佢入去飲水。搞到咁頻撲，唔知佢下次會否考慮搭政府車呢？