政情：主持區會會議遲到 張永森道歉
深水埗區議會近期動作多多，之前就推翻咗授權票制度，又計劃提出動議阻止建制派衞星組織申請撥款等，深水埗區議會主席張永森可以話周身都唔得閒。尋日當區區議會開會，作為主席嘅張永森就要主持會議，但佢會議一開波就道歉，到底發生咩事呢？
職員頻打電話 急召議員
話說尋日深水埗區社區重點項目計劃委員會召開第五次會議，會議早上十時舉行，但廿一名委員中只得三四個現身，連張永森都唔見人，搞到職員要密密打電話急召議員開會。
張永森喺十點二十分先出現，但當時仍未夠法定人數，三分鐘後當區區議員甄啟榮趕到，先湊夠人開會。張一坐低就講明要道歉，因為地區好塞車，紅綠燈多，搭(車立)又塞，所以遲到喎，聽落都覺得牽強。不過佢又似乎真係幾趕，事關佢一坐低就要飲水，抖番順條氣先。張遲到雖然唔啱，但據聞有三名委員連續三次會議唔見人，要退出委員會。張肯為遲到道歉，都算有啲承擔喇。