有人話人氣模特兒同普通模特兒嘅分別，並唔在於樣貌同身材，而係講求親和力，咁先至備受歡迎。如果覺得親和力呢三個字太過空泛嘅話，睇吓今日介紹嘅李星和就知道點樣憑住親和力，而獲得大家嘅支持。
唔講唔知，李星和嘅入行經過都幾曲折，話說佢讀中一時係全班最高，可謂鶴立雞群，不過當時佢從未諗過做模特兒，反而希望成為白衣天使。高中畢業之後，佢嘅夢想卻有所改變，因為佢喺大學修讀食品烹調，所以希望將來成為廚師喺飲食界大展拳腳。畢業後，佢覺得飲食業又唔係咁啱自己，因此先後喺一間醫療產品公司及助聽器公司工作，佢表示自己嘅性格較為好動，喺辦公室工作好似坐監一樣，呢個時候佢發覺對時裝設計有興趣，於是去到位於東大門嘅時裝設計公司擔任見習時裝設計師，期間初次接觸到模特兒工作，因而產生興趣。
李星和身高173cm，更擁有一副魔鬼身材，故此經常被邀請客串做Model，起初佢抱住玩玩吓嘅心態，然而拍咗幾輯時裝平面照後，帶來前所未有嘅滿足感，因此佢決定轉行，成為模特兒界嘅一員。雖然佢認為自己係憑住外表先至被模特兒事務所賞識，事實上唔少同佢合作過嘅媒體及廠商都大讚阿妹具有親和力及笑容夠親切，呢點先係最吸引人嘅地方，難怪人氣不斷提升。
李星和發展得相當順利，被事務所安排於江原道太白市舉行嘅賽事上以賽車女郎身份登場，當時佢對賽車女郎嘅工作一無所知，有前輩就同佢講，只需要當成攝影模特兒工作嚟做就得。不過當佢落場後，卻發現兩者有好大分別，攝影模特兒只需要望住一個鏡頭及擺甫士，而賽車女郎就要同時面對多個鏡頭，最重要係無時無刻都要展露笑容，經過連續兩日嘅工作後，佢已經習慣，同時亦鍾意咗做賽車女郎，故此其後佢密密喺首爾同釜山舉辦嘅賽事上登場，而人氣亦大大提升。親切嘅笑容更成為佢嘅標誌，皆因佢笑起嚟嘴形好似一把回力刀，予人含蓄得嚟又燦爛嘅感覺，迷倒唔少粉絲。
隨住人氣不斷攀升，佢先後拍咗多個廣告，同時唔甘於只係活躍喺平面攝影界同賽車女郎界，於是以車模身份喺國際車展上登場，穿上華麗又性感嘅晚禮服，配合火辣身材，輕易成為展場上嘅焦點。加上天生嘅親和力，更係大受歡迎，不過李星和冇因此而自滿，認為自己仍有需要改善嘅地方，希望能夠不斷提升自己，讓事業能更上層樓。
簡介：李星和擁有前凸後趷嘅火辣身材，不論穿上性感嘅賽車女郎制服抑或華麗嘅晚禮服，都能夠輕易吸引男士嘅目光。不過佢認為自己除咗笑容吸引外，自己對眼亦相當有魅力，唔知大家認唔認同呢？如果大家想了解多啲，就要Click入呢個網睇睇喇！
網址：http://cafe.daum.net/leesunghwa
出生地：首爾
身高：173cm
三圍：36-24-36
撰文：魂