「夜來風雨聲，花落知多少。」香港遭受超強颱風山竹蹂躪，點止花落樹塌咁簡單，成個城市直情亂成一團。淨係倒垃圾問題咋，港府唔嗲唔吊，搞到多個廢物轉運站大排長龍，咁仲唔止，尋日又話污水處理廠嚴重受損，污水長流，簡直鑊鑊新鮮鑊鑊甘。
嗱，渠務署係咁講嘅，西貢污水處理廠部分喉管及二級處理設施遭颱風重創，目前只能維持一級污水處理服務，即係只可處理隔篩同清除沙礫程序，唔可以利用微生物淨化污水中嘅有機污染物，現正進行搶修，亦已附加消毒程序將污水繞流近岸排放，期望減低對附近水域嘅影響喎。
咁即係點？即係住宅、商業及工業嘅污水糞水臭水，幾乎直接流出大海，即使稍加消毒，都係聊勝於無咋，污染問題有幾大鑊，諗都諗得到。屋漏偏逢連夜雨，港島南區苗鍾徑、深水灣近燒烤場同埋石澳大頭洲嘅污水壓力喉管亦出現斷裂，期間又有幾多污水流出大海，真係冇眼睇。
即係咁，康文署話就話喺受影響泳灘懸掛紅旗，叫人停止水上活動，環保署亦急忙收集水辦化驗，但仍然有泳客唔識死，照游可也，萬一搞到染病，咁就大吉利是。所以話，港府無能，泳客唔自律，後果真係災難級。講真，家陣點止泳灘水質不宜游水，泳灘設施同樣遭受破壞，例如有沙石湧入沖洗地方，堆到上天花板，垃圾、玻璃碎滿布，一步一驚心，泳客仲要雖千萬人吾往矣，隨時樂極生悲嘅咋。
講到尾，香港之所以搞到淪陷咁款，都係拜廢柴政府應變失當所賜。咪睇風暴來襲前夕，保安局係威係勢咁統籌十幾個部門話要總動員防災，將損失減至最低，查實又係豆腐渣工程，唔止未能防災，善後工作倒瀉籮蟹先至最惡頂。好似倒垃圾呢啲咁必須嘅善後安排，港府都搞到一鑊泡，連日來多區嘅廢物轉運站逼爆，倒一車垃圾竟然要排三、四粒鐘，令處理效率大減，尋日仲衰到連港島西廢物轉運站嘅垃圾槽都跪低埋，垃圾車要轉往西九龍傾倒，令排長龍情況雪上加霜。
真係諗極唔明，市面滿目瘡痍，垃圾遍地，加快處理係基本常識，業界不斷呼籲港府廿四小時開放廢物轉運站，偏偏港府懶懶閒，皇帝唔急太監急，點會唔亂上加亂吖。家陣垃圾圍城、污水四溢只係第一步，更多更大嘅亂象肯定陸續有來。
正所謂，一試便知龍與鳳。自吹「好打得」嘅港府被山竹吹到現晒形，好打得就冇嘞，人人喊打就有之，難為林鄭仲扮晒委屈，肉麻當有趣，無料扮四條，香港人真係多得佢唔少。