「九一七全港準時上班」被惡搞，皆因林鄭月娥祭出「無停工這方案」，於是佢覺得打工仔逼爆港鐵站、冒險闖過滿街的塌樹、爬過無數障礙物才可返工冇問題，而佢坐在禮賓府廢噏「完全可以體會市民因為要在鐵路站等好耐好徬徨、好嬲、好不滿，這情況下拿特首出氣無問題……」身為特首，市民的無奈佢根本完全唔上心，若然佢有多少反省能力，必然會感到政府在如此災情下安排全民返工確有不足之處，第一時間佢應該道歉！
可惜林鄭全無羞恥感，只懂死撐，還要貪天之功認叻。唔該睜開眼睇吓市民如何發揮「香港精神」，有人義載徬徨無助的打工仔、有食店老闆以百份海南雞飯慰勞清潔工、有學生自組隊伍回校幫手收拾凌亂校園、有小妹妹不怕辛苦執海灘垃圾……然則，你班高官做過乜嘢？運房局局長陳帆直情潛水潛到影都冇，搞到網民話要「拋西瓜」尋人。日前佢終於蒲頭，卻對交通大混亂不置一詞，而佢現身，只係為陪同深圳市委書記王偉中視察高鐵西九站！咁就難怪市民揶揄政府緊張高鐵西九站和港珠澳大橋有冇因颱風而甩漏，多過關心市民返工嘅安危！
一個城市經過十級颶風的蹂躪，倒下的樹木難以數計，還有不計其數的路陷、欄杆被吹倒，一夜之間，這城市如何恢復原狀？正如有人話齋，一個人大病一場，明天就叫佢復工，有可能嗎？經過山竹的肆虐，第二日要「全港準時返工」，稍有常識的都知冇可能，可是特衰政府就死拗話「冇一個機制去評估法律後果」。在非常時期還墨守機制？古人說：明者因時而變，知者隨事而制。這句話強調「變」的重要和必要性。不知變通的林鄭，市民即使拿她出氣又如何？你狂罵一塊頑石它會點頭嗎？大家還是省口氣，幻想吓有塊飛氈可以跨越重重障礙載你準時返工吧！