政情：將軍澳雙牌頭風波 白鴿勢掀退黨潮
區議會明年舉行換屆選舉，各黨各派已積極爭位，其中民主黨（白鴿黨）就爆出「雙牌頭」風波，該黨與傘兵組織、將軍澳民生關注組喺將軍澳出現撞區鬧翻。據悉，白鴿黨中委會今晚召開會議，通過將關注組列入黨內「政治組織」，即是同屬關注組成員嘅白鴿黨員，就要作二揀一決定，不得再以雙重身份行事，否則有違黨章禁止雙重黨籍要求，勢掀退黨潮。
關注組本來於黨內只屬於「地區組織」，所以就算多名成員係民主黨員亦無問題，多年來雙牌頭都相安無事。但卻因為民主黨員莊榮輝，同關注組成員、區內業委會成員李柏棠，都有意出戰西貢都善選區，搞到黨內有聲音要求將關注組定性為政治組織，從此分家。
柯耀林唔回應是否退黨
首當其衝嘅係關注組主席、白鴿黨黨員柯耀林，佢回覆查詢時話結果屬預料之中，但仍未接獲黨秘書處通知，如無意外，中委會會先通報全黨，再睇下相關人士會唔會退出關注組，再處理雙重黨籍嘅問題。至於會唔會退黨，佢話暫時唔回應，要等黨正式通知再決定。
身兼中委嘅立法會議員林卓廷強調，因為涉及區議會撞區，所以中委會先討論有關問題，暫時睇唔到其他地區有咁嘅情況。咁擔唔擔心爆發退黨潮，佢話呢個係無奈嘅結果。