政情：林子健秘撈議助 譚香文笑稱執到寶
喺舊年聲稱自己被擄走，最後被警方拘捕控以向警員虛報有人犯罪嘅民主黨（白鴿黨）成員林子健有新動向！今年暑假開始，林擔任黃大仙區議員、前綫前成員譚香文的議員助理。雖然譚已經係無黨派議員，但白鴿黨黨章禁止黨員參加其他政團，林子健涉違反黨章。
譚香文辦事處近日向各大傳媒廣發採訪通知，而電郵係由「Howard Lam」發出，同林子健英文名相同。
譚香文回覆查詢時確認林依家喺佢議辦做兼職，主力負責傳媒公關工作。至於林有無向黨申報？譚話唔清楚白鴿黨運作，但作為獨立議員，又跟足區議會條例同勞工法例招聘，而林做過議員助理，經驗豐富，笑稱用雞碎咁多錢請到對方，係執到寶先啱。
月薪數千元
據了解，譚香文辦事處有一名全職助理，而林月薪數千港元，平常可在家工作，間中返議辦。
白鴿黨就話黨章只禁止黨員擁有雙重黨籍，但無禁止黨員喺其他政黨或議辦打工，所以林子健唔需要向黨申報，亦無違反黨章，「都係打份工啫」。