政情：想做鄉郊代表選民 朱凱廸遭村民反對
住喺新界八鄉嘅立法會議員朱凱廸，曾揚言有意選八鄉元崗村村長，所以最近登記做鄉郊代表選舉嘅選民。不過有四名村民提出反對，搞到上周五要展開聆訊，由法官決定朱係咪村民，案件尋日繼續審議，本來雙方陳詞後會有結果，卻又因爭拗立法會屬唔屬於居住地，最終法官押後到今日裁決。
話立法會係居住地
朱凱廸話爭拗點係立法會係咪居住地，對方要求交出證明，交代自己每日有幾多時間逗留喺屋內。但據佢了解，法例規定如果市民只有一個居住地，就毋須要證明長期喺屋內生活，點知對方堅持話佢經常喺立法會大樓，咁都應該列為居住地。
佢笑稱，咁廚師日日喺廚房做十幾個鐘，廚房都係居住地？中環商廈好多人OT，咪好多人住喺度？坦言如果對方立論正確，就會變咗「Office home」，希望自己唔好被DQ。
如果真係被DQ，佢唔會被視為村民，連參選嘅入場券都攞唔到。但班村民都話無見過佢本人出入，咁畀佢做到選民都未必爭到村長喇！