政情：教聯會 教協鬥法 叫楊潤雄科水救災

山竹令唔少學校遭受破壞，爆玻璃窗、課室門被吹歪，呢啲已經係小事，有啲學校仲冧樹冧到校車都駛唔入，學生返學當然好危險啦。教聯會同教協都唔放過呢啲搶分嘅機會，連續兩日要求教育局盡早宣布翌日停課，就連出稿嘅時間都非常近，不斷鬥早出稿。尋日，兩大教育團體又出新招，雙雙要求教育局發放特別津貼或撥款，因為學校又冧樹，又爆玻璃，門都甩埋，維修費都相當重皮咁話。

教聯促每校撥款10萬元

教協向全港學校發出「學校風災特別津貼」問卷調查，一百五十間學校中，有近七成需清理塌樹，逾兩成二學校嘅風災善後工作開支超過十萬元，但逾七成七學校話，現時教育局嘅緊急修葺津貼，未能應付學校需求，主要因為維修項目唔符合申請資格，好多塌樹清理等多個項目，都未能成功申請津貼，資助未涵蓋幼稚園，而且處理塌樹好貴(口架)，動輒要十萬蚊。教協會長馮偉華擔心，要修葺校舍，隨時搞到要抽調其他學習津貼，影響學生嘅學習機會，促請盡快公布新津貼，並檢討緊急修葺津貼涵蓋範圍等。

至於教聯會就去信教育局，促請局方向每所學校發放十萬蚊一筆過撥款，以應付各項維修工程及清理費用，另外政府可向損毀嚴重的學校以實報實銷的方式追加撥款。

教局：會發緊急修葺津貼

教育局回應指， 局方會為資助學校提供緊急修葺，亦將會為公營學校、直資學校提供一項特別津貼，包括修剪樹木、清理校園廢物等，參加幼稚園教育計劃嘅幼稚園，亦會獲得協助，該項特別津貼會根據學校本身嘅需要而發放，詳情將於下星期公布，有需要嘅學校可按本身嘅情況提出申請。

兩大主要教育團體鬥到火紅火綠，搞到教育局每日都急急回應訴求，相信依家只係開始，睇怕遲啲就點樣申請津貼等等，兩個團體仲有排鬥，楊潤雄肯定有排煩啦！