中環出更：轟土地選項唔全面 葉劉撕「點心紙」
土地供應專責小組正就十八個土地選項做公眾諮詢，諮詢期下周結束。身兼行政會議成員同立法會議員嘅葉劉淑儀尋日就聯同其所屬嘅新民黨就小組選項作回應。葉劉形容十八個土地選項係「點心紙」，批評「點心紙」內容唔全面，外界唔少意見都冇涵蓋在內，直言「填（紙）都冇意思」，仲即場撕爛小組文件添！唔知佢咁激動，有冇嚇親小組主席黃遠輝呢？
反建議搬監獄釋放用地
葉劉話十八個土地供應選項係太簡化，佢哋建議嘅藍塘填海方案、搬遷監獄以釋放監獄用地，重置葵青貨櫃碼頭、發展新界祖堂地等都冇納入選項，所以填呢張「點心紙」根本都冇意義。佢仲反建議港府倣效澳門，向中央申請香港以外嘅內地海域填海，選址都有埋，就係喺大嶼山南面嘅桂山島，認為該處鄰近大嶼山，十分方便，仲可以考慮將監獄、甚至警校搬埋去，釋放依家嘅監獄用地喎。
而佢嘅前黨友、實政圓桌立法會議員田北辰（田二少）亦都喺尋日出擊回應，佢就話原則上支持填海造地，如選址用作發展房屋會優先支持。至於具爭議嘅粉嶺高爾夫球場用地，佢就話嗰度有大量古樹、祖墳同文物，就算全面發展都未必可以提供大量房屋，但可以考慮局部發展咁話。
卓妮