中環出更：擔心山竹太強 李鏡波蒙古趕返港防風
雖然山竹已經走咗幾日，但佢嘅威力相信唔少市民仲歷歷在目，其中香港專業及資深行政人員協會會長李鏡波都話山竹威力強勁，上星期尾本來仲喺蒙古開緊會，睇完天文台嘅消息之後隨即改機票返港，不過因為太多人改，初初都改唔到，輾轉下最終坐到最後一班航班返港，認真幸運！佢拿拿臨趕返屋企黐膠紙，做番足啲防風措施先，但佢就覺得相比一九六二年嘅溫黛，山竹就遜色少少。
查實打風期間李鏡波一直都好擔心影響該會十二周年誌慶晚會，原來該會「生日」係九月十八日，每年都盡量揀呢日舉辦周年誌慶，佢話如果山竹嚟遲一日，睇怕都要延期。
鄭國漢：嶺大復課大致順利
不過該會前會長陳紹雄反而唔擔心，事關佢話該會好多專業人士已計算過，認為山竹會嚟得快走得快，唔會影響到「生日會」，所以佢都充滿信心，加上自己凡事都有兩手準備，所以一早都準備好延期工作，如果真係唔好彩要改期都好快搞掂。
今次天文台提早咁多發出預警，唔少市民都一早做好準備，嶺南大學校長鄭國漢都唔例外，事前已喺校內做好防風措施，但學校咁大，一時三刻好難幫全校玻璃都黐晒膠紙，惟有盡量黐，至於塌樹就更加係冇辦法，結果事後冇爆玻璃，但樹就塌咗好多，好彩塌樹嘅位置唔喺主要通路，所以復課後都大致順利。
至於位處市區嘅香港公開大學，校長黃玉山話校內大多選用強化玻璃，所以玻璃完全冇問題，只係塌咗兩棵樹，影響甚少，唯獨校內一個戶外嘅工程架係最大隱憂，所以事前已通知承辦商做好加固工作，成功捱過山竹侵襲。其實佢喺打風當日擔心到不得了，翌日即使停課都隨即返學校視察，情況算係比預期中理想咁話。
卓妮