「天氣不似預期，但要走總要飛。」歌仔都有得唱喇，做機師真係唔少人嘅夢想，不過若然入職國泰航空就唔同講法咯。皆因國泰為咗縮皮無所不用其極，諗到冇嘢好諗咯，竟然連見習機師都唔放過，學師未滿一身債，問你點頂。
呢，國泰同旗下嘅國泰港龍修訂機師入職薪酬同福利條件，一改三十年來資助學員飛行訓練費嘅做法，今年底開始，新入職嘅見習機師需自付一半飛行訓練費，大約係五十萬到六十萬元，會喺佢哋頭三年嘅薪金扣除。咁仲唔止，改變薪酬計算方法及削減福利後，機師即時變相減薪，一個月少咗成萬蚊收入，加埋每月逾萬元還款，真係慘過弟弟。國泰係就係年慳四千萬呀，但機師士氣受損，仲隨時引爆大規模跳槽，飛行質素仲點保證呀？
國泰縮骨成咁，慳皮成咁，正喺澳洲受訓嘅幾十名學員首當其衝，成為新修訂嘅犧牲品。本來以為做機師可以平步青雲，到頭來竟然淪為孭數幾十萬嘅債仔，咁樣畀人賣豬仔法，衝上雲霄就冇份嘞，怒髮衝冠就有之。
大家有眼睇，國泰今年上半年錄得二億六千幾萬元虧損，過去兩年半累計虧蝕更加逾二十億元，流血不止都不足以形容，真係要諗計喺石頭鑽出血先掂。佢哋舊年已經借頭借路搞業務重組，大拿拿裁走幾百個本地管理層同後勤員工，今年裁員潮依然未止。所以話，國泰莫財成咁，燶成咁，向一班飛行學員落手，根本係遲早問題。
講真，國泰為咗搵多個錢，連乘客感受都唔在乎，仲邊得閒理班員工死活？好似增加波音機隊經濟客艙座位呢條屎橋咁吖，由每行九個位加到變十個，唔止乘客變成沙甸魚，仲搞到派餐時間大增、行李存放空間不足，都未計航班延誤、機票超賣、機件故障嗰啲衰嘢，服務沒有最差，只有更差，話係虐客都冇誇張。
衰開有條路，國泰因為管理不善，喺權威調查機構Skytrax最佳航空公司排名榜連續四年下跌，由第一名跌到今年嘅第六名，服務跌Watt跌得幾勁都唔使多講，睇個勢，仲有排跌添呀。鬼咩，國泰之前炒燶期油錄得巨額虧損，高層唔係諗計改善服務，反而挖空心思剝削乘客同員工，造成趕客同打擊員工士氣嘅惡性循環，想翻身都幾難咯。
一句到尾，國泰航空，愈做愈燶。呢塊昔日傲視全球嘅金漆招牌，今日淪為負評不絕嘅爛銅爛鐵，唔係艙門壞，就係廁所壞，管理層不思進取，亂象一定陸續有來，大家拭目以待啦。