政情：邵家輝怕雙失密謀棄選區會

交棒區務主任 橫額露端倪

Peter自二○○七年贏得寶馬山選區議席之後，連續兩屆區議會選舉都喺未有競爭對手之下自動連任，佢喺寶馬山老巢嘅地位可以話係牢不可破。Peter兩年前出任批發及零售界立法會議員，成為雙料議員，工作量難免倍增，尤其作為功能界別嘅議會新丁，鞏固業界支持成為其工作首要目標。據了解，Peter呢兩年已覺分身不暇，為免區議會工作招人話柄，所以有意喺下屆區議會讓出已經盤據咗三屆嘅寶馬山選區。至於邊個係接棒者，橫額已經講出咗答案，就係同佢同屬自由黨，為該黨常務委員會委員兼寶馬山區務主任嘅阮建中。

樹根連失兩議席 前車可鑑

而Peter被問到有關地區交棒嘅傳聞時就未有正面回應，但就承認做咗立法會議員之後從未去過旅行，搞到老婆係咁投訴。佢又大讚阮建中地區工作資歷深，曾經協助過多場選戰，對地區議題熟悉。聽佢嘅語氣，相信交棒都好大機會係「既定事實」喇。

目前非建制派仍未有人去寶馬山「插旗」，不過教訓往往係從歷史中吸取。民建聯前立法會議員鍾樹根（樹根）喺東區漁灣選區擔任區議員二十四年，終喺二○一二年當選立法會議員。原本係雙料議員嘅佢，二○一五年區議會換屆選舉時，就遭「傘兵」、現任東區區議員徐子見挑戰，結果樹根敗選，失去漁灣老巢，至翌年嘅立法會選舉亦未有連任，頓變「雙失」。前車可鑑，Peter假如唔放棄老巢，最後搞到兩頭唔到岸，變成樹根翻版就弊喇。