中環出更：高鐵通車儀式 泛民請政府食檸檬
廣深港高鐵香港段將於今個月二十三日通車，政府會喺正式通車前嘅一日舉行通車儀式，陸續有民主派立法會議員收到出席通車儀式嘅邀請函，但一直反對高鐵西九龍站實行一地兩檢嘅民主派議員就決定要請政府「食檸檬」，表明唔會應邀出席通車儀式。
目前至少有八名民主派立法會議員獲邀出席通車儀式，包括立法會交通事務委員會副主席林卓廷（阿廷）、司法及法律事務委員會副主席郭榮鏗、資訊科技及廣播事務委員會主席莫乃光（Charles）等。
莫乃光稱私務纏身
阿廷就批評高鐵一地兩檢安排衝擊香港自治同法治，所以唔會出席通車儀式。與其同屬民主黨（白鴿黨）嘅立法會議員涂謹申同胡志偉雖同樣獲邀，但兩人都因當日唔喺香港而唔出席，所以白鴿黨並冇議員出席。
至於民主派另一政團公民黨（公文袋）五名立法會議員中，只有四人收到當局邀請，該黨議員郭家麒就冇獲邀。公文袋批評政府選擇性邀請嘅做法係唔尊重個別政黨，加上一地兩檢違反《基本法》同一國兩制，高鐵又出現管理不善同超支等問題，故決定一致唔出席。至於本身係民主派會議召集人嘅Charles亦都因通車儀式當日有私事要處理，唔會出席儀式。
卓妮