中環出更：李家仁難忘溫黛襲港「有人嗌救命」
香港嘅夏季經常都會打風，住喺香港嘅人都見慣不怪。不過外號「小明」嘅兒科醫生李家仁講起打風就話怕怕，點解佢咁驚打風呢？原來係同上世紀六十年代吹襲香港、造成嚴重損失嘅颱風溫黛有關。
李家仁話，溫黛襲港時佢住喺灣仔唐樓，當時屋企用木窗，好輕易就會畀風吹開，所以風暴來臨時，佢同屋企人全程要用條繩扯住個窗，防止木窗被吹走。呢場人與大自然嘅搏鬥，真係聽見都覺得辛苦喇。不過，最令佢印象深刻嘅係當時所住大廈嘅天台木屋，因為木屋係以鋅鐵作屋頂，風力太勁時屋頂就會被吹起，打風期間佢就不斷聽到有人叫救命，淨係幻想都感受到幾咁無助咁話。
陳仲尼買定膠紙黏窗門
講番尋日個活動，雲集咗唔少政商界人士，包括中華總商會會長蔡冠深、常務會董陳光明、考試及評核局前主席陳仲尼、創新及科技局局長政治助理張曼莉等。講到打風，陳仲尼就話佢試過因為八號風球而提早收工，由公司揸跑車返屋企要上斜路，當時大雨將唔少大石沖走兼碌落馬路，當佢返到屋企，先發現車牌撞甩咗，連車頭都凹埋，好彩個人冇事。不過陳仲尼就認為香港係福地，估計風暴帶嚟嘅破壞唔會太大，但佢都有買定膠紙，預備打風時用嚟黏窗門。
陳光明就話，佢原定聽日出海玩樂，但因為呢兩日有颱風嚟緊香港，所有船伕幾日前已經拒絕預約，所以估計今次呢個颱風嘅威力有番咁上下。佢又話，唔少香港人打風都鍾意出街，早幾日傳出打風消息，啲娛樂場所嘅預約就迅速爆滿。不過佢就話自己唔係呢類人，打風會乖乖留喺屋企休息喎。
卓妮