中環出更：立會訪英交流 肥彭陰魂不散
立法會議會聯絡小組委員會訪英團喺英國時間星期二，同英國國會跨政黨國會中國事務小組會面，當地上議院同下議院都有人出席，身為上議院議員嘅末代港督彭定康（肥彭）周不時嚟香港指指點點，又點會放過今次機會？佢都有現身，認真陰魂不散。
陸頌雄叫出少啲聲
肥彭口話唔支持「港獨」，但係就指中央政府同港府借港獨議題打壓泛民同異見者，形容咁做係危害言論自由喎。香港各陣營議員反應大不同，工聯會陸頌雄就叫肥彭等英國政客對香港政治事務「出少啲聲」當幫忙，同為建制派嘅何君堯就話香港回歸後一切都好好，一國兩制有充分落實，經濟數據又勁咁話。
民主黨嘅尹兆堅就叫英國政界關注多啲香港事務，包括確實執行一國兩制，確保言論、學術同結社自由等，又話咁先係履行《中英聯合聲明》嘅責任。不過英國國會最後只係話，會繼續透過《香港半年報告書》去關注香港。
卓妮