尋日係開學日，又有唔少大學生宣獨，教育局官員就話港獨「冇空間」、「不合適」喎，咁即係點？即係縱容咯，即係姑息咯。港獨明明違憲又違法，點知港產官僚唔係「遺憾」復「遺憾」，就係輕描淡寫，宣獨零成本咯喎，班搞事分子仲唔鬆毛鬆翼變本加厲咩。
所以話啫，香港禮崩樂壞，法治不彰，癥結就係港府有法不依，養癰遺患，港獨問題係咁，佔中問題係咁，黑金禍港係咁，漢奸黎刑恐記者係咁，連工廈僭建亂象亦都唔例外。本報探射燈專題報道，踢爆工廈僭建愈演愈烈嘅亂象，有喺工廈平台僭建鐵皮屋做出租派對場所，有將多個單位打通改做寫字樓，甚至有擅自拆走防火門換上玻璃門嚟豪裝一番，總之就係視《建築物條例》如無物。
好似其中有個個案咁吖，早喺十一年前就被發現違規，不過業主大玩拖字訣，一直冇還原單位，難得屋宇署又非常之配合，清拆令發咗就算，之後再冇跟進。當局有法不依吖嘛，咁就難怪僭建歪風愈刮愈猛，既有劏房、迷你倉、食肆、補習社，又有Band房、工作室、宗教聚會場地等，簡直五花八門，應有盡有。工廈僭建怎一個「亂」字了得，講到尾都係政府縱容出嚟嘅咋。
講真，工廈僭建問題講咗N咁多年，官老爺一直借咗聾耳陳隻耳，早兩年牛頭角工廈奪命大火，政府先至話要加強打擊，點知又係講咗當做咗，執法固然有名無實，巡查一樣少得可憐。話就話因為進入懷疑僭建單位視察要事先向法院申請手令，實情係官老爺出名多一事不如少一事，少一事不如不做事，只會是是但但，邊得閒主動出擊？審計報告曾經踢爆有近七萬份清拆令，違規業主根本冇遵從。鬼咩，明知屋宇署長年烏眉瞌睡，睬佢都有味喇。
係人都知，工廈僭建危機四伏，一來冇經屋宇署批准同入則，二來冇安裝消防花灑頭，三來樓梯後巷堆滿雜物，萬一發生火警，隨時一鑊熟。屋宇署班官有眼無珠，對工廈僭建闊佬懶理，即係攞居民性命較飛啫。
話時話，早喺約二十年前，屋宇署曾經估算全港大約有八十萬個僭建物，拆晒嘅話要用一百年，睇嚟佢哋一早決定長命工夫長命做，拖拖拉拉等閒事啦。港產官僚係呢種貨色o架啦，雖然身受全球數一數二高人工，但就大事唔識做，小事做唔好，香港有乜法子唔七國咁亂，不斷沉淪吖。
難為呢個政府仲話自己「好打得」，應該係「好Hea得」、「好懶得」、「好可惡」至真。