政情：工廠露台種出石榴 沈運龍感動似抱孫
香港地方矜貴，想享受田園樂一啲都唔容易。中華廠商聯合會常務會董沈運龍（Aaron）早前喺社交網站擺咗多張相，原來佢喺位於紅磡工廠區嘅公司露台種石榴，頭一兩年冇料到，點知今個夏天碩果纍纍，Aaron當然開心到極。其中一張相見佢雙手捧住紅石榴，表情好感動，唔講仲以為佢抱孫添！
結20個果實 唔捨得食
Aaron笑笑口解釋，咁感動係因為以前試過種葡萄、檸檬，但係都種得唔好，可能因為公司露台位於低層，而且夾咗喺兩座工廠大廈中間，陽光唔夠，後來改種石榴，只係用好少泥，估唔到得咗。佢仲話，今次結咗成廿個咁多嘅果實，味道好甜，仲有啲唔捨得食添！
Aaron好鍾意種嘢，多年嚟無論屋企及寫字樓搬咗幾次，都會有平台或天台花園。點解咁鍾意？有「中東王子」稱號嘅佢笑笑口話，可能因為長期喺沙漠，所以特別喜歡綠色植物喎。