政情：范國威怕悶 着格仔外套開會
立法會議事廳一向都畀人莊嚴嘅感覺，男議員大部分都係着黑色、藍色同埋灰色西裝。不過立法會議員范國威（Gary）最近就着咗一件深、淺藍色格仔西裝外套去開會，以為淺色格仔西裝睇落會好花喱花綠？Gary都幾識襯衫，下身着番條淨色褲，即刻顯得穩重，仲幾醒神添！
強調着衫要有自信
唔少男士都會抗拒淺色衫，不過Gary就一於少理，間唔中都會着粉紅色、淺黃色、湖水藍等顏色嘅冷衫。佢話深色衫比較悶，佢鍾意色彩繽紛，所以會買啲淺色衫配搭吓。佢仲教路，着衫要有自信先着得好睇喎。
至於款式，Gary最鍾意嘅係直間，至於件格仔外套係有次行街見到，覺得幾靚，所以買嚟試吓。佢話件外套感覺相對悠閒啲，所以會趁星期五或者放假開會先會着。見佢好似幾識打扮，唔知係咪太太喺背後做形象指導？Gary笑稱係睇書自學。仲自爆太太着衫比較踏實，兩公婆路線好唔同，所以冇乜情侶裝。