政情：擬引禁賽罰款議規 建制泛民大鬥法

藉以懲罰議員開會行為不檢

自去年修訂《議事規則》後，民主派嘅拉布能力已被削弱，但建制派期望可再收緊《議事規則》，特別係針對叫囂、離開座位衝向主席台等不檢點行為。議規會尋日提出嘅三項諮詢正正針對呢點，文件開宗明義問，應唔應該喺《議事規則》中為議員嘅失當行為訂立新嘅處分方法，如果議員同意，係咪應該設立機制處理議員一般嘅失當行為；以及最惹爭議嘅一項，就係議員喺立法會或全體委員會會議上作出極不檢點行為，係咪應該被禁止出席日後嘅會議及作財政處分，即係禁賽同罰款。

文件提出，假如議員喺立法會或全體委員會進行期間，因行為極不檢點而被令立刻退席，立法會主席日後可根據命令或藉由通過議案，禁止被逐議員出席下次會議，甚至之後若干次會議。此外，議員喺「禁賽」期間，薪酬須被扣起，或處以罰款。不過文件提醒，目前《基本法》同《立法會（權力及特權）條例》未有賦權立法會扣起議員薪酬或施加罰款，或者有需要制訂新法例或修訂現有的規定。

泛民倘贏補選 可重奪否決權

修改《議事規則》須經分組點票通過，功能組別原本就係建制派天下，至於直選議員方面，目前建制派仍多民主派一席，所以建制派仍擁有分組點票話語權。不過，假如民主派喺十一月底嘅九龍西補選中勝出，地區直選數目就同建制派睇齊，即可重奪否決權，因此，外界預期建制派或想搶喺補選前再成功修改《議事規則》。據了解，建制陣營對補選前出手未有共識，因為復會已係十月中旬，加上《施政報告》及《國歌法》等重要議程，要喺十月底前完成修改《議事規則》嘅程序等同「不可能的任務」。但消息人士指，最終「衝定唔衝」好大部分視乎諮詢結果，「如果整體建制派議員都無大異議，就考慮衝埋佢」。

議規會主席謝偉俊指，議規會最快十一月先再開會，強調會按既定程序處理，唔存在喺補選前定後嘅考慮。民主派召集人莫乃光就指禁賽同罰款都事關重大，但竟然喺議員放暑假期間諮詢，質疑「使唔使咁急」？佢強調，民主派會全力反對有關建議，保障議員出席會議同出糧嘅權利。