中環出更：容海恩反串做爸爸 教影學生相
立法會議員容海恩成為人妻唔夠一個月，不過已經一早投入工作，好似開會傾港鐵沙中線連番事故，又有份去示威請願。當日盛傳奉子成婚嘅容海恩，尋日上載短片大講親子活動，唔通係為自己生小朋友後諗定點樣親子？
其實容海恩今次拍片，係知道學生開學一定要用到學生相，所以就粉墨登場拍一段教學短片，教大家點樣喺屋企都拍得到學生相，而呢項影相工程唔能夠一個人完成，所以佢就話可以當做親子活動喎。
丈夫袁彌昌冇出鏡
佢話呢個自家製學生相並唔困難，只要兩把間尺、A4白紙同兩部手提電話就可以，不過就要爸爸同媽媽一齊幫手。兩張白紙就係為咗減下巴陰影同埋頭頂嘅光，至於另一部手提電話係打燈用，再加埋手機應用程式調節光暗，咁就大功告成，可以自己列印或拎去沖曬喇。雖然話係親子活動，但片段中就見唔到爸爸嘅身影，亦唔見其丈夫袁彌昌客串，佢惟有一人分飾兩角，畫兩條鬚反串做埋爸爸嘞。
卓妮