中環出更：手機App密碼交同事 邵家輝過被安排人生
創新科技同創意產業係近年香港嘅新趨勢，唔少後生仔都會想向呢方面發展，不過講到科技就並非個個人都咁熟悉嘞！立法會批發及零售界議員邵家輝（Peter）出席「香港地品牌大獎2018」頒獎典禮時講起，自己多年前剛開始用智能手機都唔係好熟悉，試過唔小心剷咗個通訊應用程式後，搞咗成日都唔識裝番，認真蝦碌。
Peter話，自己一向唔太熟悉電腦，同電腦有關嘅事交晒畀同事處理。剛興起用智能手機時，自己都有即刻買，但只係識用基本嘢，好多特別功能都唔識用。依家連應用程式（App）密碼都畀埋同事，有嘢就叫同事幫佢裝，就連行程都係同事填埋，形容自己每日都係「被安排」嘅人喎！
陳百里試過創業研發藥物
講起科技，國貨公司後人余國春就話，依家網購愈來愈普及，公司都有開始發展，但係香港買嘢太方便，所以發展網購最緊要係留意美國、加拿大等海外市場，例如邊啲貨品喺海外好難買到，亦要注意物流公司係咪可靠等。
今次頒獎典禮籌委會主席謝嘉恩話，香港有好多出色嘅品牌，希望今次活動可令更多人認識本地薑。創新及科技局副局長鍾偉強、商務及經濟發展局副局長陳百里都喺度，陳百里話自己未入政府時，都試過創業，有份參與研發藥物，所以見到一班創業人士特別有感受，寄語佢哋搵啱好嘅團隊好重要，亦要注意上中下游嘅合作，即使做傳統產業都要搵出突破點，先至可以喺市場佔有一定份額。
卓妮