政情：戴矽膠指環養生 楊孟霖夠創新
香港中小企經貿促進會理事楊孟霖（Ricky）一向點子多多，近年佢由廠佬轉型為主力發明創新產品、研發專利技術，旗下生產具抗菌功能嘅矽膠廚具產品，亦係全球知名嘅領導性品牌。見佢左手中指都戴上一個黑色矽膠指環，唔通想話畀人知，佢係「矽膠大王」？
Ricky笑笑口解釋，個指環係遠紅外線保健產品，內含自家研發嘅專利技術，唔止矽膠咁簡單。佢話按中醫經絡對應器官嘅理論，中指對應心臟，所以戴咗之後可以改善血液循環，血液循環好咗，有助紓緩各種痛症，自然都瞓得好喇。Ricky亦都發明咗適用於唔同部位、唔同形狀嘅產品，真係多到數唔晒。
笑稱久病成醫
明明係廠佬出身，點解識咁多病理？Ricky笑稱係因為「久病成醫」喎。佢又講起，最近成功研發咗一個專利枕頭，顯得好雀躍，仲話相信可以改善城市人失眠嘅問題喎。