政情：馮興禮升呢人夫 學做煮飯佬
「男主外、女主內」嘅家庭傳統已經過晒時嘞，好似啱啱新婚嘅勞工及福利局局長政治助理馮興禮（Henry）咁，做咗「人夫」之後嘅首要任務之一，就係要學識買餸同煮餸，做一個合格嘅「煮飯佬」。
太太最愛照燒雞翼
勞福局局長羅致光出名準時收工，作為下屬嘅Henry自然絕少加班，相反佢從事事務律師工作嘅太太工作時間就比較長喇，所以準備晚餐嘅責任自然落喺Henry身上。Henry話每日放工多數都係去超級市場買餸，而好彩佢喺英國讀書時都會自己下廚，所以煮家常小菜對佢嚟講都冇乜難度，而佢太太就最鍾意食佢整嘅照燒雞翼喇。
不過佢就話，因為太太日日有好嘢食，縱壞咗太太嘅味蕾，太太由每日好期待食乜餸，開始變成好似食家咁品評，「佢問我點解啲芽菜會有草青味，我真係唔識點答。」雖然口裏抱怨，但係佢喺外出食飯期間，都會不時研究餐廳啲菜式，唔使講都估到佢度緊夜晚煮咩餸畀太太食喇。