中環出更：泛民區議員 參觀西九站豎中指影相
廣深港高速鐵路香港段通車在即，前日就有多個區議會前往西九龍站參觀。雖然泛民主派議員向來就高鐵有異議，但地區上嘅泛民代表未有杯葛今次參觀，不過唔代表佢哋支持，事關影大合照時竟然公然「豎中指」展示粗口手勢，被批行為低能兼幼稚。
尋日有六個區議會一齊去參觀西九龍站，包括東區、中西區、南區、離島區等，四十幾名區議員更齊齊喺車站大堂一幅大型壁畫前影大合照。唔少區議員都豎起大拇指畀Like影相。不過，東區嘅泛民議員就搶晒鏡，事關企喺後排最側面嘅東區區議員徐子見、古桂耀同麥德正大舉不文手勢。
建制議員批幼稚
徐子見兩隻手都豎起中指，笑笑口咁放喺下巴前，古桂耀仲將中指放喺胸前，驚死無人見到佢做不文手勢，至於麥德正則相對鬼祟，企喺徐同古二人中間，右手中指曲起放喺嘴邊似抓痕。照片傳出後惹來唔少建制派議員熱議，有人批評三人做法相當幼稚，真係好小學雞囉。
卓妮