中環出更：係愛呀！吳國榮為囝囝戒煙
食煙唔健康係人都知，但對煙民嚟講戒煙並非易事。香港灣仔區各界協會同灣仔區議會屬下食物及環境衞生委員會早前聯合搞咗個幫煙民戒煙嘅活動，民政事務局副局長陳積志同東華三院主席王賢誌出席活動時，都話自己唔係煙民，仲參加一氧化碳呼出量測試以證明冇講大話，結果兩位測試結果都係正常非煙民水平，果然好健康。
今次活動搞手之一、香港灣仔區各界協會主席吳國榮就分享佢嘅戒煙故事。佢話本身食咗好多年煙，都冇諗住戒，後來因為成日咳，特別係同人傾緊偈時都會忍唔住咳，就覺得唔係幾好意思喇，加上囝囝投訴佢食煙好臭，所以就決定戒煙。佢話依家已經冇食煙喇，但間唔中都有食一兩支雪茄。
伍婉婷爸爸嫌加稅貴唔食
灣仔區議會屬下食物及環境衞生委員會主席鍾嘉敏就唔係煙民，不過佢話初中時都有同學引誘過佢食煙，但佢就覺得食煙好臭，所以冇食，甚至冇再同食煙嘅同學玩。而佢爸爸就食咗好多年煙，但後來都為咗佢戒煙。事關佢細個嗰陣，覺得爸爸食煙好臭，就同細妹一齊唔畀爸爸抱同唔理爸爸，結果爸爸就戒煙喇。父愛嘅力量認真厲害。
香港吸煙與健康委員會副主席伍婉婷就話，佢爸爸都試過為咗佢戒煙，因為佢讀書時試過哮喘性氣管炎，入咗醫院兩個星期，結果佢爸爸就由喺屋企入面食煙，轉咗去露台度食，仲愈食愈少，可惜嘅係一直都唔斷尾。不過佢爸爸後來都成功戒到煙，原因就係政府有次加煙稅加足一倍，爸爸嫌貴就索性唔食喎。
卓妮