野火燒不盡，春風吹又生。登革熱個案爆不停，皆因官老爺滅蚊唔徹底，搞到病毒四圍傳播；正如有「南亞村」之稱嘅深水埗通州街天橋底，當局拆啲唔拆啲，導致治安毒瘤不斷擴散，市民真係多得佢哋唔少！
話說食環署、民政事務處及警方喺強大輿論壓力下，日前採取聯合行動入村拆屋，可惜只係做騷咁做，拆來拆去仲剩番十間木板屋戙喺度，十足十內地嗰啲「釘子戶」咁款，真係睇見都眼冤。記者尋日落去視察過，發現村內有一名保安員駐守，據講每半小時巡邏一次，睇吓有冇人從事不法勾當，以及防止有人再佔地搭屋，期間見有一名便裝食環署職員陪同，喺村內木板屋門外張貼告示，進行查封。
難聽啲講句，食環署職員拍住個保安，手無寸鐵、街邊擺檔嘅老弱婦孺見到就話腳軟啫，對於五大三粗、孔武有力嘅南亞兵團嚟講，阻嚇力仲低過紙板警察。呢嗱，有村民就自設「天文台」實行反監視，只見數名大漢有晒部署、有晒分工，輪流踩單車喺村內來回兜圈，金睛火眼（目及）到實有冇生面口嘅人入村，唔知嘅仲以為攞正牌。你咪話，爆起大鑊上嚟，食環同保安分分鐘畀南亞幫打番轉頭都似！
所以話啫，南亞村之所以好似百足之蟲咁，死而不僵，就係因為官老爺欺善怕惡，姑息養奸，一場拆村大龍鳳，淨係敢向「吉屋」埋手。官老爺冇嘢好賴，居然賴話擔心拆錯露宿者個竇，真係唔講猶自可，一講把幾火。對住本地露宿者，惡吏強奪財物有之，淋水驅趕有之，狼過華秀隻狗，只要官老爺對付南亞幫有一半咁「勇武」，就唔會搞成今日咁喇。
家陣最大鑊嘅係，當局一味「封艇」而唔「拉人」，村內嘅爛鬼猶如癌細胞四處流竄，成個深水埗淪為九反之地。據地區人士所講，通州街橋底部分「村民」轉戰隔籬通州街公園，搬晒細軟當正自己屋企不特止，仲隨處大小二便，甚至疑似有道友啪針上電，附近街坊避而遠之。附近嘅北河街、鴨寮街亦唔好得幾多，大批假難民公然聚賭，吆五喝六，殺聲震天，完全當警方冇到，一旦有人玩埋放數又或者勾結黑社會，後果不堪設想。
一滴水可以睇穿整個世界。有油麻地找換店六年內三遭南亞匪來犯，不堪其擾，決定關門大吉，直斥香港治安畀南亞兵團搞壞晒。冇計喇，香港就係咁嘅嘞，政府死都唔肯退出國際難民公約，結果開門揖盜，納稅人養狼狗，咬心口，再咁落去，遲早鵲巢鳩佔，成個香港畀佢哋佔領，到時一國兩制仲係一國兩制，不過就唔係「港人治港」，而係「南亞人治港」咁解啫！