政情：喜獲B女 陳李妮圓夢做媽咪
博愛醫院前主席陳李妮（Lily）尋日喺社交網站放咗幾張BB相，宣布「母女平安」、「爸爸快樂」，原來佢唔聲唔聲喺美國生咗個囡，消息勁爆。朋友們紛紛畀讚，留言恭喜佢。
美國待產逾5個月
Lily係高齡產婦，佢同老公結婚多年，一直想生BB，今次終於願望成真。佢話呢趟去美國三藩市待產超過五個月，B女上個月已出世，但因為老公唔想太高調，所以到依家先至公開好消息。
講起湊女經，Lily話B女好易湊，食得、瞓得，連陪月姑娘都話係佢見過最易湊嘅。最好笑係有一次佢幫囡囡換片，接連換咗五塊，因為囡囡不停屙，腸胃真係好喇。
Lily仲話，BB已改好名，中文叫陳詩妍，英文叫Phyllis，係佢同老公一齊改嘅，佢仲講笑話詩妍諧音好似「施施然然」咁，夠晒淡定喎！過多幾日佢就會帶BB返香港，到時掛住佢哋嘅朋友就可以去探望喇。