政情：林順潮話當年 北上行醫遭父反對
每個人都有本身嘅舒適區，要走出舒適區需要一定嘅勇氣，一向對醫療問題好上心嘅眼科醫生林順潮，尋日出席一個活動演講時提到，當年考慮北上行醫時，問過父親意見，對方即刻彈起，非常反對。
終落實計劃 父出錢支持
林順潮憶述，父親當時話以前冒生命危險，由深圳河偷渡嚟香港，質疑佢當年竟然選擇到內地發展，林順潮最終「意見接受，行動照舊」，因為佢覺得要做值得做嘅事，最終籌集資金去落實計劃時，父親就出錢支持，睇嚟為人父母始終係子女最強嘅後盾！
林順潮提及香港醫生喺內地發展，最大困難係即使能夠提供優質服務，但病人都未必識你，而若然唔能夠建立到品牌，或會無法營運；佢又希望，可以將香港醫生以病人為中心嘅醫德醫風喺內地落地生根咁話喎。