政情：郵輪碼頭甩皮甩骨 梁美芬力數五宗罪
政府大拿拿斥資八十億元興建嘅啟德郵輪碼頭，由二○一三年啟用至今已經五年，但呢個所謂香港新地標卻換來唔少污名，包括「死城」、「鬼地方」、「停屍間」等，真係冇樣好，日前仲因為有兩班郵輪同時泊岸、碼頭又安排失當，搞到大批旅客要喺碼頭大堂苦等，真係醜死怪。立法會議員梁美芬日前亦首次經啟德郵輪碼頭乘搭郵輪去玩，但換嚟一肚氣，炮轟碼頭五宗罪，包括交通配套少、冇購物區、碼頭設施簡陋等，矛頭直指負責碼頭嘅商務及經濟發展局局長邱騰華。
一家大細去玩 換來一肚火
話說梁美芬喺美國留學嘅大仔大學畢業，本來打算一家人一齊去美國參加大仔畢業禮，但梁唔想其八十九歲嘅媽媽搭飛機舟車勞頓，所以就改為成家人經啟德郵輪碼頭搭郵輪出發玩幾日，順便同大仔喺郵輪上影畢業相，希望可以一家人過一個難忘假期。不過，梁就因為碼頭嘅配套設施搞到眼火爆，直言碼頭營運模式及配套設施都有唔少地方要改善。
不設行李輸送帶 寄存簡陋
梁就力數郵輪碼頭五宗罪，第一宗罪係早已為人詬病嘅交通配套問題。佢話碼頭交通配套太少，直接去碼頭嘅交通工具大部分集中喺九龍灣一個大型商場；而乘搭郵輪抵港後，等候接駁嘅交通工具地點亦都唔方便，旅客至少要步行十分鐘先到，如果拎住大型行李或行動不便，就真係極為不便喇。
梁又批評碼頭行李認領方面冇效率，事關碼頭唔似機場，冇行李輸送帶，一大堆行李送到後就大批旅客一擁而上去攞，分分鐘逼出事，佢仲形容係「安全隱患」，覺得碼頭應該參考機場做法，提供行李輸送帶，提升效率。唔止領取行李有問題，碼頭第三宗罪就係行李存放問題。梁批評，碼頭嘅行李寄存處設施簡陋，有需要改善咁話。至於碼頭第四宗罪同第五宗罪就分別係碼頭內冇購物區，旅客想買嘢都冇；仲有明明碼頭有靚海景，但候船區就唔美觀，仲要指示牌唔清晰添。
睇嚟啟德郵輪碼頭唔掂檔都並非「浪得虛名」，邱騰華真係要執執佢，否則坐郵輪搞到好似走難咁，香港旅遊業聲譽真係畀佢敗晒。不過，好彩郵輪營運管理唔會好似政府咁垃圾，梁美芬同家人上到郵輪有得游吓水、食吓嘢、睇戲輕鬆吓，仲有得玩VR Game（虛擬實境遊戲），一家人都玩得好開心。