中環出更：立陶宛踩單車迷路 鄭文聰父女歎啤酒賞美景

Daniel話今次係佢哋第一次去俄羅斯，十日行程由丹麥哥本哈根開始，期間經過好多唔同國家。最好笑係佢同囡囡喺立陶宛參加一個單車團，兩人喺一個靚到不得了嘅海灘蕩失咗路，同大隊失散。人生路不熟，原本應該好驚先啱，但兩人見個海灘咁靚，竟然索性買啤酒歎吓先。Daniel笑言，好彩電話有地圖App(手機應用程式)，最終都有驚無險搵番團友。

劉黃寧達陪囡囡去法國夏令營

珠寶設計師劉黃寧達（Leta）就陪女兒Katarina到法國參加夏令營，包括喺法國楓丹白露參加兩星期暑期課程，以及喺阿爾卑斯山上學烹飪。個女上堂期間，Leta就周圍走，仲去咗一趟加拿大探親友。有一對律師夫婦專程由百慕達飛去溫哥華同佢短聚，事關Leta一家曾經喺百慕達住過八年，老友重逢特別開心。

香港收藏家協會會長唐卓敏太太林青（Erica）都同媽媽去咗台灣幾日。原來Erica媽媽有台灣籍，呢趟返去主要係換新身份證，順便睇吓啲樓。Erica笑笑口話都想買樓用嚟度假用，因為老公都好鍾意當地美食，不過呢趟暫時未有收穫，所以兩母女就盡情歎吓美食先喇。

劉黃寧達（左）同來自百慕達嘅好友夫婦Lisa（右）及Peter（中）短聚，十分窩心。

林青（左）同媽媽（右）幫襯主廚阿治（中）發辦嘅日本菜，大讚美味。

卓妮