香港房屋問題愈演愈烈，公屋上樓輪候時間愈拖愈長，港府冇能力拓土建屋，最叻就係搞啲無謂嘢，耍吓花拳繡腿。呢，房協鼓勵資助出售房屋業主將單位分租出去，結果就被業主大潑冷水，話「相見好同住難」，有關政策睇怕都係出師未捷身先死嘅嘞。
即係咁，房協計劃容許未補價嘅資助出售房屋業主，將單位分租畀公屋輪候冊人士，目前有萬四個單位符合資格，有關計劃細節最快月底出爐，預計會有幾千個單位參加。房協冇錯係一番好心，但實情係咪咁樂觀先？記者走訪黃大仙、深水埗同北角房協三大市區屋苑，受訪業主一面倒講到明冇興趣做包租婆，一來「自己都唔夠住」，二來「唔會同三唔識七嘅人住」，三來就係「寧願空置都唔分租」。聽到啦，分租計劃冇人吼呀！
係人都知，香港地除非豪宅，一般人屋企出名面積細，有啲直頭轉個身都難，就算有啲單位有三間房，其實都只係啱啱夠屋企人住，點分租畀人吖？你知啦，居住面積影響同居關係，就算閂埋門一家人都時不時嗌霎，何況加個外姓人或者家庭入嚟？啱啱先有調查話唔少劏房女住客曾被性騷擾，邊個保證分租單位唔會衍生類似問題？
一句講晒，除非嗰啲特別等錢使嘅家庭，否則冇可能對分租計劃有興趣。而對租客嚟講，計劃一樣欠吸引力，好簡單，分租房需要同業主一家共用廚房廁所，極之唔方便，相比之下，劏房雖然細，但起碼叫有個獨立空間，難怪地產界人士都唔睇好分租計劃，話租金平唔過劏房三成或以上，咪使旨意有人租。咁即係點？即係進一步打擊業主分租意欲囉。
仲有，管理費、差餉、水費、電費等點樣攤分？房協冇你咁好氣，淨係叫業主同租客講掂數再寫入租約，仲講到明將來有乜拗撬，貴客自理，安心做其甩手掌櫃。喂，好心當局唔好再玩人啦，如果真係想利用現有資源，不如以身作則，將舊政府總部、禮賓府分租出去好過。
講到尾，無論係房協分租單位計劃，抑或港府話要搞嘅過渡性房屋，統統都係杯水車薪。弊在港府拓土建屋無能，最耍家就係轉移視線，仲要築室道謀，專家小組成立咗成年，土地大辯論亦搞咗四個月，仍然係乜結論都冇，期間公屋上樓時間一拖再拖，私人樓價仲繼續升到嘭嘭聲添！
家陣嘅情況就好似病人瀕死，醫生唔去醫，反而召集大班專家研究復研究，仲叫埋全民一齊討論，研究出十八種醫療方案，最快都要廿年至見效，講得嚟病人晨早香咗啦。咁樣嘅房策，你話係救人定害人吖？