政情：公民講場：蚊患肆港難收科 陳肇始中斷假期急補鑊

登革熱在港爆發，患者由去過獅子山公園蔓延至長洲居民，全港十五個區嘅蚊患指數爆燈，形勢好似「蚊隻圍城」。有市民批評政府「手腳慢」，應該及早教居民點預防，亦有長洲居民反映出外經常被蚊隻追住嚟咬，苦不堪言。香港咁大鑊，但係食物及衞生局局長陳肇始就滋滋油油休假。尋日佢終於醒覺，通知政務司司長會提早結束休假，原本下月五日先至復工提早至今個月廿九日，雖然比原定返工日提早咗一個星期，但係都仍然有超過一星期先至返，唔知啲白紋伊蚊會唔會變乖啲，等埋佢復工先至興風作浪呢？