政情：李暉義教老幼武術 回饋社會
運動可以減壓，咁義教運動相信減壓程度仲高。知名武術家李暉早前喺中環一個商場行超市，見佢推住一架購物車，好滋油，一時買吓麵包，一時同超市職員有講有笑，似乎係熟客。李暉笑笑口話，最近佢喺北角開咗間武館，不時會義教小朋友同老人家，幫吓人當回饋社會咁話。
每月帶團到外地交流
李暉話，依家嘅小朋友忙住讀書，少做運動，希望透過義教幫助佢哋郁動多啲身體，咁樣腦筋都會靈活啲。而長者亦一樣，運動幫到佢哋保持手腳靈活。佢又話，近嚟每個月都要帶團去外地，包括日本、韓國同台灣等，到當地交流武術同文化。
咁忙唔怕冇時間陪屋企人咩？原來佢個女早幾年去加拿大參加工作假期計劃，結果鍾意咗當地生活，仲喺嗰邊搵咗份為大型商場做策劃嘅工作，唔使佢擔心，所以咪多咗時間義教囉！