政情：黃之鋒帶團去大館 變專家講監獄生活
早前曾經入獄嘅香港眾志秘書長黃之鋒喺社交網站貼文，見到佢去番監獄喎，唔通佢再次入冊？原來佢係帶團去由中區警署建築群活化成古蹟及藝術館嘅大館，仲話自己以過來人身份講解懲教制度。坐過監，確係經驗豐富啲，唔知佢會唔會認同「坐過監令人生變得更精彩」嘅講法？
指劏房面積比監獄更不堪
依家兼職幫立法會議員區諾軒嘅黃之鋒話，近日區諾軒帶團參觀立法會之後，佢都帶團參觀大館，講解監獄生活、入冊程序等，唔少團友對於單人監倉咁狹小，都露出驚訝神情。黃話，基層劏房戶嘅人均居住面積，分分鐘比起監獄仲要不堪喎！
黃仲話，政黨搞嘅街坊旅行團總係畀人一種去政治化嘅感覺，其實只要花心思，都可以令市民多啲理解社會問題咁話。咁係咪代表佢連地區工作都想政治化呢？