政情：工記家規 議員缺席罰捐錢 議規修訂有啟示

過去立法會拉布成風，所以觸發建制派修改《議事規則》，議規會就今年工作進度提交報告時，更形容今次係自第一屆立法會以來最大規模嘅修訂。不過修改《議事規則》嘅步伐未有停止，議規會喺休會前決定諮詢全體議員，研究就議員行為失當施加新處分，例如喺經濟上作出懲罰、唔准被驅逐出會議廳嘅議員參加會議等，不過立法會仍未通過新修訂，所以一系列針對議員行為嘅罰則仲係得個講字。

議員唔使受罰住，但工記議員就唔同喇，事關工記走得比議規會前多步，喺今屆定下不成文規定，如果工記議員缺席立法會大會而導致流會，就要將一日嘅薪金，即大約三千元捐予慈善團體，而且要向工記會長吳秋北交代點解冇去開會。不過呢條家規都唔係鐵板一塊，如果事先講定，畀其他兄弟互相補位就仲有情講。至於提出呢條家規之人，就係前立法會議員王國興。

何啟明陸頌雄犯過規被罰

現時工記中年資最淺嘅立法會議員何啟明同陸頌雄，喺過去兩年議員生涯中就曾因流會而被罰捐錢。何啟明試過喺拉布戰中失守，當時佢喺辦事處接受訪問，雖然聽到點算人數鐘聲響起超過十分鐘，已經感受到危機，立即趕番去議事廳，可惜最後都係差少少。至於陸頌雄就試過兩次捐錢，其中一次流會係為抗議青年新政梁頌恆同游蕙禎重新宣誓，與建制派集體離場抗議。雖然被罰，但佢就認為工記做法有助自我警惕同自律，亦都係負責任表現。

王國興發起 冀有帶頭作用

王國興講起呢條家規時，大讚工記議員夠承擔，好高興見到佢哋響應添。佢解釋，當年喺議會中批評泛民拉布，先即席提出呢個建議，而自己任內都有做足，但每次流會佢都在席而未試過捐出一日薪金喇！佢就希望工記今次起到帶頭作用，令到其他建制派都跟隨，畀市民自行評價經常拉布同觸發流會嘅泛民，係咪都需要負責任喎！