中環出更：陳淑玲遊日 即摘即食和歌山水果
香港人好鍾意去日本吃喝玩樂，早前喺貿易發展局舉辦嘅日本交流晚宴上，見到中華廠商聯合會常董陳淑玲（Shirley）、立法會飲食界議員張宇人等人，佢哋都笑認好鍾意去日本，形容當地好食又好玩。Shirley仲自爆有與別不同嘅玩法，就係去和歌山縣摘水果，試過秋天摘杮、柑，夏天就摘桃，仲要即摘即食，諗起就開心。
日本嘅水果出晒名靚，唔知Shirley喺果園有冇試過食得太多呢？佢就笑笑口話冇，因為自己食嘢好有節制。同場嘅香港餐飲聯業協會會長黃家和都對日本水果讚不絕口，印象最深刻係食過成個桃咁大嘅士多啤梨。遲啲佢會帶一班香港食品企業去日本考察，希望發掘啲靚嘢嚟香港。
周啟良哈日必食意大利菜
香港貿易發展局總裁方舜文同副總裁周啟良都係日本擁躉，方舜文一年要去三、四次，佢話雖然香港有好多日本餐廳，但係當地魚生新鮮啲，又多選擇，價錢仲平過香港一大截，難怪佢樂此不疲喇！周啟良就笑稱自己咁嘅年紀，唔會去玩太驚險嘅嘢，所以通常都係去飲飲食食。不過佢唔淨止食日本嘢，次次都一定會食意大利菜，仲話有人形容日本嘅意菜係意大利本地之外最好食嘅添。
周啟良話香港係日本食品最大嘅出口市場，佔咗日本整體出口市場嘅四分之一。所以當晚佢哋專登請日本京都米芝蓮星級餐廳名廚高橋拓兒到港，以日本新鮮食材炮製美食，賓客都食到舔舔脷。
卓妮